1Cor 4 | MEU | STEP | Taunimanima ese ini bae lalolmai toma: ai na Keriso ena hesiai taumai bona Dirava ena hereva hehuni iregudia taumai.

1 Corinthians 4

1 Taunimanima ese ini bae lalolmai toma: ai na Keriso ena hesiai taumai bona Dirava ena hereva hehuni iregudia taumai. 2 Matona, ireḡudia taudia namodia be kara momokani taudia. 3 Lauegu lalo-hadai binai: umui ese ba hahemaoro henigu, eiava taunimanima haida ese, una na ḡau pipikina mo. Lau danu sibogu asina hahemaoro heni, 4 badina be egu kerere ta asina lalo davari. To una dainai maoromaorogu basie gwaurai; ihahemaoro-henigu tauna na Lohiabada. 5 Taunabunai, ḡau ta basio hahemaoro henia, negana be dounu; ela bona Lohiabada bainema. Ia ese dibura ai e hehunimu ḡaudia na diari ai baine veri lasi; taunimanima edia lalo-hadai danu baine hahedinarai. Bena taunimanima ta ta Dirava ese baine hanamodia.

6 Varavaragu e, umui daimui ai ini ḡau vada na gwaurai, lau bona Apolo latamai ai; bena ai emai amo vada ba diba, Buka Helaḡa ai e tore herevadia ba badinadia, ta bavabia dae una ta ba dadaraia na garina. 7 Be, daika ese oi mo e ha-idaumu? Bona dahaka ḡau oi dekemu ai, a tau ta ese se henimu? A bema ta ese e henimu, dahaka dainai o heaḡilaiamu, ta basinema henimu na heto? 8 Umui na ina harihari vada o boga kunumu; umui na ina harihari taḡa taumui; umui na lohia o tomamu, a ai be lasi. Boma lohia momokani bema namo, bena ai be umui ida baitama lohia hebou. 9 Badina be lau na tomamu Dirava ese ai aposetolo taumai na gabe taumai ai vada e halaomai, vada e revamai mase; badina be tanobada bona aneru bona taunimanima bae raraia hebou ḡauna ai vada e halaomai. 10 Ai na kakavakava Keriso dainai, a umui na Keriso lalonai o aonegamu. Ai na mamanoka-mamanoka, a umui na gogoada. Umui na e heatolaimuimu, a ai na e ihi-ihiraimaimu. 11 Dina iboudiai ema bona harihari e hitolomaimu, a ranu masemu, asi emai dabua, e tutumaimu, asi emai noho gabuna. 12 A hekwarahimu, imamai amo a ḡaukaramu. E uduguiraimaimu, to a hanamodiamu; e daḡedaḡe henimaimu, to a haheaukamu; 13 ladamai e hadikamu, to a hamarumarudiamu. Tanobada taḡena ai bona ḡau iboudiai momodia ai vada e halaomaimu ema bona harihari.

Do baina igomui ita

14 Ini hereva asina toremu umui ihahemaraimui totona; a natugu, egu lalokau, bama sisiba henidia heḡereḡerena ai umui na sisiba henimuimu. 15 Ena be ihadibamui taudia Keriso ai bema gerebu ta, to tamamui basiema hoho; badina be Keriso Iesu bagunai lau ese sivarai namo ai na havaramui. 16 Taunabunai lau na noimuimu, lau ba haḡoigu. 17 Badina bunai Timoteo vada na siaia vasi dekemui ai; ia na egu lalokau merona mai momokanina ida, Lohiabada alonai. Ia ese egu ḡaukara Keriso Iesu lalonai baine hahelalolaimui, gabu idoidiai ekalesia iboudiai na hadibalaidia heḡereḡerena.

18 Haida na vada e hekokorokumu, badina be idia banava lau na basina vasimu e tomu. 19 A Lohiabada baine ura, lau na asi vanahana baina vasi; bena hekokoroku taudia baina dibadia; edia hereva basina diba, edia siahu mo baina diba. 20 Badina be Dirava ena basileia na dia hereva ai, to siahuna ai e miamu. 21 Dahaka o uramu? Kwadi-kwadi auna baina vasilaia, eiava lalokau bona manilu ai baina vasi.